monumenta.ch > Seneca Maior > sectio 20 > bavPal.lat.1554.182 > sectio 31 > csg458.31 > sectio 13 > sectio 32 > sectio 55 > sectio 22

Wortauswahl für das Suchen

Melden Sie einen Fehler in dieser Sectio
Hrabanus Maurus, Martyrologium, 1, 22
XI KAL. In Hispaniis civitate Valentia, passio S. Valerii episcopi, et Vincentii diaconi et martyris, qui passi sunt sub Daciano praeside. Vincentius enim dum Christi nomen publice profiteretur, a Daciano iussus est in equuleum extendi, ibique diutissime torqueri: hinc ad patibulum raptus, imo ex equuleo depositus tortores suos ipse praecurrens moras carnificis arguit: torquetur ibi sanctus Dei martyr, tunditur, flagellatur, exuritur, et distentis membris crescit ad poenam. Imprimuntur ardentes pectori laminae, et liquefacto inter ipsas candentes ferri acies liquore guttarum stridens flamma respergitur, vulnera vulneribus imprimuntur, tormenta tormentis desaeviunt, sales ignibus sparsi crepitantibus minutis per membra dissiliunt, et iam non ad artus, sed ad ipsa viscera suppliciorum tela iaciuntur. Post haec in locum obscurissimum ac fragmentis testularum expersum truditur, sed ibi lucis amoenitate et quietis per angelicum ministerium potitus est: inde quoque, iubente praeside, in lectolo asportatus, ad Dominum cum palma martyrii migravit. Postea corpus eius in mare mitti praecipitur, sed immissum celerius post fluctus, Deo volente, ad littus reducitur, quod religiosa quaedam vidua nomine Ionica sepulturae primum tradidit, Christo triumphum eius miraculis probante. Eodem die ad Aquas Salvias nativitas sancti Anastasii monachi et martyris de Perside, qui post plurima tormenta, carceris, verborum et vinculorum, quae in Caesarea Palaestinae perpessus fuerat, a Persis postremo in Perside multa poena affectus, atque ad ultimum decollatus est. A rege eorum Chosdroe.